A coruñesa Paula Cons converte en película a historia de amor de Pérez Galdós e Emilia Pardo Bazán

Os escritores Emilia Pardo Bazán e Benito Pérez Galdós gozaron dunha relación amorosa que agora se coñece con detalle a través das súas cartas. A directora coruñesa Paula Cons vai plasmar a historia de amor nunha película, O meu ilustrísimo amigo, que xa comezou a rodar en Madrid e Canarias e cuxas gravacións incluirán tamén Galicia.

Na pel de Emilia Pardo Bazán, atoparemos a actriz dos Mallos Lucía Veiga mentres que o papel de Galdós recae no intérprete canario Paco Déniz. A realizadora destacou o referente de Pardo Bazán polo seu feminismo e por ser unha muller forte na súa época.

Paula Cons —directora da exitosa serie ¿Dónde está Marta? e da longametraxe A illa das mentiras, a súa ópera prima— explica que a película non xorde dela.:“É un encargo do que ao final me namorei. A idea foi do guionista Javier Pascual, director de contidos en Disney Plus e que antes traballaba en El Ministerio del Tiempo. El viu que neste tema había unha película e falou co produtor canario e este chamoume a min hai tempo”.

A realizadora coruñesa decidiu apostar tamén coa súa produtora, Agallas, para que o filme contara cunha parte galega, tendo en conta a importancia para Galicia da protagonista. Ademais, a TVG tamén apoia o proxecto e o fin é emitir a película.

Cons subliña que a longametraxe descubrirá á audiencia o lado máis humano destes dous escritores universais: “Hai unha parte de ficción que reconstruímos en base ao que contan nas cartas. A min, hai moitas cousas interesantes. A relación entre eles era absolutamente contemporánea. A problemática que viven e como a afrontan é moi moderna de maneira que calquera persoa de hoxe en día pode ver o filme e sentirse identificada”. A directora herculina fíxase nun punto en especial. “Unha muller cun físico non normativo como Emilia é ao longo da película unha muller desexada por varios homes interesantes. Esa mensaxe importa. Ademais, resulta moi sexi ver dúas persoas tan brillantes a interactuar”, sinala a autora.

Cons detalla que o filme fíxase en tres momentos da relación Bazán-Galdós. “Vemos como xorden os problemas e como se resolven na súa relación. É unha película que te atrapa porque ten unha trama clara e entretida. Arranca no 1887 e remata no 1889”, engade a cineasta.

Respecto da elección dos intérpretes protagonistas, aclara que Paco Déniz era unha aposta da produtora canaria Jugoplastika. “Cando empecei a ensaiar con el deime conta de que era unha boísima elección. No caso de Lucía Veiga, tíveno moi claro. Nin fixemos casting para o seu papel. Eles están increíbles nos seus papeis. Hai unha química brutal entre eles”, sinala.

A realizadora confesa que, entre os seus obxectivos, figuraba facer “unha peli sexi e así é”. “É moi paixoal. Entre eles, hai todo ese lume, esa química e esa tensión sexual non resolta”, desvela.

Cons fai fincapé en que, con este filme, queren fuxir do clasicismo e ofrecer unha película moderna e actual. “Eles eran naturalistas e iso busca o filme” cuxa rodaxe acabará o 21 deste mes. Para a estrea, aínda non hai data pero será nas televisións autonómicas de Galicia e Canarias.

En canto ás localizacións, explica que haberá varias, entre elas, os exteriores do Pazo de Meirás, onde viviu a escritora coruñesa. No caso de Canarias, destacou que “os edificios históricos son alucinantes”. “Levei unha sorpresa con Las Palmas porque a arquitectura é moi interesante. Hai moitos edificios magníficos desa época”, conta Paula Cons. Por último, a directora destacou que o filme conta cun equipo moi feminimo no que os cargos principais recaen en mulleres.

Suscríbete para seguir leyendo